O pasado ano o proxecto de banda deseñada “Sangre y sol” logrou o premio do Ministerio de Cultura de Uruguai para a edición de novela gráfica. O seu autor non era de Montevideo, senón o ferrolán de 33 anos Abel Alves (Abel Álvarez Rejo), que en 2011 emigrou ao querido país sudamericano.
A novela, que mañá sae á venda en Uruguai e Arxentina, así como no resto do mundo a través da editorial Dragón Cómics (www.dragoncomics.com.uy), é de corte histórico e narra as aventuras de Antón Dedo Douro, un bandoleiro galego que viaxa ao convulso Xapón de mediados do século XIX, a piques de entrar na súa modernización, para ser gardacostas do cónsul español. Na cidade de Yokohama o galego terá que desmontar un complot que ameaza a seguridade dos diplomáticos extranxeiros na illa.

nas fragas do eume
Unha das curiosidades deste traballo é que varias das páxinas de “Sangre y sol” están en galego, cando o protagonista recorda o seu pasado. Para Alves “isto é un fito na historieta uruguaia, onde apenas se difunde a cultura galega, máis alá dalgúns tópicos, e moito menos o seu idioma”. Outra das curiosidades é que o booktrailer da obra (pode verse neste enderezo electrónico: www.youtube.com/watch?v=LmPme4gYpUQ) está gravado nas Fragas do Eume.
Abel Alves traballou en prensa escrita debuxando para diarios como “Galicia Hoxe” e revistas como “Uruloki”. En Uruguai publicou dúas novelas gráficas coa editorial Dragon Cómics, e participou no proxecto educativo  “Bandas Orientais”, así como en antoloxías como “Otoño” da AUCH (Asociación Uruguaya de Historietas). Resultou gañador dos Fondos Concursables para a Cultura 2013 do MEC, co citado “Sangre y Sol”.
Éste ano foi elixido pola AUCH para representar a Uruguai na Feira Internacional do Libro de Bolivia. Actualmente prepara unha historieta sobre o xenocidio armenio de 1915. Conta coa súa propia páxina web: www.comicsabelalves.com.