O salón de actos do Vicerreitorado de Ferrol acollerá desde hoxe e ata o venres o 17º Curso de Pensamento Carlos Gurméndez, organizado polo Club de Prensa de Ferrol coa colaboración da Universidade da Coruña, a Consellería de Cultura, a Deputación da Coruña e a Asociación Amigos da Universidade-Campus de Ferrol.
A edición deste ano leva por título “Humor e ideoloxía  en tempos convulsos”, o que permitrá abrir un espazo para a reflexión e o debate sobre o papel deste xeito de abordar a realidade en Galicia, os museos nacidos para lle render tributo ou o traballo dos caricaturistas.
Estes serán algúns dos temas a abordar na xornada de hoxe, que contará coas intervencións, entre outros, do debuxante ferrolán Siro López –director do curso xunto á profesora de Documentación da UDC, María Antonia Pérez–, Félix Caballero Wangüemert ou Xaquín Marín.

apertura
O acto de apertura está previsto para as dez, momento a partir do cal terán lugar as conferencias. O programa continuará mañá cunha xornada adicada ao humor desde a perspectiva das artes, as letras e o pensamento e na que tamén se fará especial fincapé na figura do galego José María Cao Luaces, considerado como “o pai da caricatura na Argentina”.
O venres haberá espazo para a mítica revista La Codorniz así como para a relación entre o humor e a guerra ou a política.

matrículas
Tal e como onte se informou desde a organización, ata o momento matriculáronse un total de 70 persoas. Ademais, o prazo de inscrición estará aberto ata as dez da mañá de hoxe, momento no que dará comezo a cita. Así mesmo, lémbrase que, á marxe dos apuntados –que recibirán a súa correspondente certificación de asistencia– as conferencias estarán abertas a todos os interesados.