O salón de actos do Antigo Hospicio ferrolán acollerá, este mércores a partir das 19.00 horas, dúas actividades organizadas pola Sociedade Cultural Medulio.

En primeiro lugar, presentarase o libro “Recoñecemento Internacional de Galiza Nación”, editado por Vía Galega, que xira en torno ao IX Congreso de Nacionalidades Europeas, polo que o ano pasado cumpríronse 90 anos da participación e inclusión de Galicia. Esta sesión estará conducida por Nicolasa Castro, profesora e representante da plataforma social responsable da publicación. A continuación, o presidente da fundación Galiza Sempre, Rubén Cela, impartirá a conferencia “A teoría leninista do dereito de autodeterminación”.