A Xunta salientou en Mañón –nunha visita da conselleira do Medio Rural, María José Gómez, na que estivo acompañada polo rexedor, Alfredo Dovale, e pola delegada territorial en Ferrol, Martina Aneiros– a contribución do programa Leader á creación de emprego e á dinamización das zonas rurais.

A titular do goberno autonómico achegouse a coñecer o campamento de turismo O Recuncho do Sor, posto en marcha cun investimento de 77.000 euros, grazas a esta liña de subvencións.

O proxecto levou a cabo obras civís e de instalacións. Tamén estudos ou gastos de constitución e adquisición de terreos ou inmobles. Esta iniciativa, remarcou a conselleira, foi promovida polo Grupo de Desenvolvemento Rural (GDR) Seitura 22 para dispoñer dun aloxamento turístico singular con capacidade para 16 prazas, adaptado para persoas con mobilidade reducida.

Desde a Consellería apuntan que este programa afonda na mellora das condicións para crear e manter emprego no rural, así como para impulsar a economía con proxectos que xeran postos de traballo e asentan poboación. A medida atópase actualmente baixo o Plan Estratéxico da Política Agraria Común e asinouse un convenio de colaboración cos GDR para a aplicación das Estratexias de Desenvolvemento Local Participativo.
Así, o programa está dotado de 56,9 millóns de euros ata 2027, dos cales 17,6 millóns están destinados aos gastos de funcionamento e os 39,6 millóns adicionais son para as operacións a terceiros que se executarán a través de liñas de achegas.

Anteriormente, incide a Xunta –mentres a medida Leader estivo enmarcada no Programa de Desenvolvemento Rural (PDR) de Galicia 2014-2020–, aprobáronse máis de 1.500 proxectos, consolidáronse máis de 4.000 empregos e creáronse uns 1.100 novos. “Neste contexto o Goberno autonómico mobilizou máis de 169 millóns de euros cunha axuda pública de 77,5 millóns de euros para operacións a terceiros”, sostén a Consellería.