Nuria García Gonzalo, terapeuta ocupacional do Hospital de Día do Servizo de Psiquiatría e Saúde Mental do Complexo Hospitalario Universitario de Ferrol, que desenvolve o programa Afeccións Transformadoras, sostén que “polo feito de ser humanos necesitamos momentos de lecer, e afeccións nas que o noso potencial, a nosa esencia, aquilo no que temos brillo, se manifeste en estado puro”.

Neste programa seguen as liñas do Plan Estratéxico relativo á saúde mental 2030, e poñen o foco tanto na prevención e a atención de calidade para toda a cidadanía dende a participación cidadá, como na promoción dun estilo de vida saudable. 

Así, no marco do Programa de Terapia Ocupacional, no Hospital de Día, traballan tódolos mércores “a importancia das afeccións, o valor do tempo de lecer, e a conexión deste con nós mesmos e co noso entorno natural”. Dan un paso máis, e trasladan esta actividade habitual a un traballo comunitario centrándose nun modo de lecer e coñecendo os xogos de rol. 

Deste xeito,  no Centro Cívico de Canido do Concello de Ferrol, maña venres 25, ás 11.00 horas, terá lugar a videoconferencia: "Que son os Xogos de Rol e que beneficios teñen", aberta a cidadanía, no marco deste Programa de Terapia Ocupacional no que traballan as Afeccións Transformadoras. Esta videoconferencia correrá a cargo de Fran Valverde, editor con ampla experiencia neste campo. A entrada é libre ata completar aforo, e pódese seguir tamén por Youtube. 

Esta acción forma parte dun ciclo que continuará con outras actividades relacionadas co lecer este mesmo ano e o ano que vén. Un tempo de lecer que debe ser de calidade.

 “Hai momentos vitais no que o tempo de lecer é o primeiro que sacrificamos, pero tamén hai momentos nos que a través do lecer nos salvamos”, explica Nuría García

García sostén tamén que "non se trata de facer actividades por facer, é conectarnos con nós mesmos e co que nos rodea desde aquilo que nos motiva e que nos gusta”, de aí esta actividade fóra do seu espazo habitual e no marco da súa comunidade, unha actividade de inclusión que “une ó entorno de xeito natural e aberto, como sociedade, creando vencellos”, afirma. 

“Lecer non é estar a descansar ou deitado. O lecer é un espazo transformador, no que saímos máis completos despois da súa experiencia”, engade esta terapeuta ocupacional. 

O lecer cando é frutífero e de calidade “serve para que te atopes mellor”, engade a responsable. 

Sobre a cuestión en elexir os xogos de rol esta profesional explica que, “en investigación sempre necesitamos que haxa unha persoa que nos abra o campo, é dicir, que nos poña en contacto non coa teoría senón coa poboación para investigar. 

Esta é a idea deste ciclo, que sexa unha apertura a outro campo, é dicir, que nos poña en contacto non coa teoría senón que nos poña en contacto conformas de lecer activas e creativas", conclúe.