A Biblioteca de Galicia acolle desde este xoves unha exposición sobre Florencio Delgado Gurriarán, o homenaxeado de 2022 no Día das Letras Galegas, con ao redor de 40 pezas bibliográficas --libros, xornais, CDs ou revistas-- pertencentes aos fondos custodiados no Gaiás.

A mostra, 'Letras Galegas 2022: Florencio Delgado Gurriarán', foi inaugurada polo secretario xeral de Cultura, Anxo M. Lorenzo, que incidiu na importancia de reunir esta obra, "moita dela difícil de atopar, con libros que son primeiras edicións, e na que se dá conta do legado deste orixinal poeta e a súa influencia mexicana".

Lorenzo agradeceu o importante traballo de difusión do historiador Ricardo Gurriarán, familiar do homenaxeado e autor da súa primeira biografía.

Gurriarán, que tamén participou no acto, mostrou a súa alegría por "esta colaboración tan importante que fai a entidade para difundir a obra de Florencio".

A mostra foi comisariada por Lorenzo Romero, técnico da Biblioteca de Galicia e pretende "facer un pequeno percorrido para coñecer a obra máis significativa do escritor e poeta ourensán e mostrar os lugares onde transcorreu a súa vida, tanto por terras valdeorresas, como mexicanas".

Nun comunicado, destacan que se trata do primeiro homenaxeado que representa aos intelectuais do exilio mexicano, onde brotaron "numerosas iniciativas culturais e proxectos editoriais de diversa índole".

Na exposición poderán observarse o catro únicos números da revista Vieiros, da que Gurriarán foi impulsor. Proximamente, indican, poderán consultarse en Galiciana-Biblioteca Dixital de Galicia.

Tamén estarán nos expositores as primeiras edicións dos libros nos que colaborou o ourensán e nos que se reflicten as súas facetas de tradutor e activista cultural.