O Consello da Cultura Galega estreou 'Caligrafías musicais', un proxecto que recupera conferencias sobre o ámbito musical galego, o que supón unha nova liña de divulgación dentro do Arquivo Sonoro de Galicia (ASG).

Segundo trasladou o CCG nun comunicado, este proxecto terá unha periodicidade bimensual e ofrecerá as reflexións versadas de nomes como Xosé Filgueira Valverde, Xosé López Calo, Bautista Varela de Vega, Joám Trillo, Ramiro Cartelle, Carlos Villanueva, Javier Garbayo ou Manuel Balboa.

Deste xeito, o seu obxectivo é rescatar a erudición de prestixiosos estudosos no ámbito musical galego e revalorizar compositores, estilos musicais ou instrumentos, que forman parte dá cultura musical de Galicia.

Así, na primeira entrega de 'Caligrafías musicais', o polígrafo Xosé Filgueira Valverde reflexiona sobre os textos rosalianos para fixarse nos seus aspectos sonoros e musicais.