Javi Rodríguez (Cebarca): “É a nosa primeira final e temos moitísima ilusión”

Dos 7 aos 14 anos durou a primeira etapa de Javi Rodríguez no Cebarca e agora, con 29, vive a segunda, que principiou con 21. Esa identificación co club dálle a esta final unha transcendencia enorme.

É a primeira final do Cebarca...

Si, é a primeira na historia do club e tanto o equipo como a xente do pobo está moi ilusionada. Ímolo vivir como o que é, porque para nós estar aquí é un premio á tempada que fixemos, con altibaixos, si, pero completando un torneo de Copa moi bo, no que eliminamos a tres equipos de Primeira, o que demostra que tamén fixemos cousas ben.

Cal é a principal fortaleza do Cebarca?

Temos un grupo moi bo, levámonos todos moi ben, estamos moi unidos... Somos como unha familia e iso axúdanos a competir. Os cuartos contra O Val e a semifinal contra o Eume, aparte de xogar ben, gañámolos polo empuxe e a ilusión que tiñamos por sacalos adiante. O noso forte é a ilusión coa que vivimos cada partido, ademais de ter xente de calidade.

Que destacarías do rival?

Os dous partidos que xogamos este ano gañáronos eles. O Perlío é equipo moi ben plantado, sobre todo defensivamente, moi difícil de que encaixe gol e ademais ten xogadores doutra categoría que tamén deciden os partidos. Se es bo defensivamente e logo arriba tes dous ou tres xogadores que che marcan a diferenza, danche regularidade e argumentos para facer o que fixeron, que é ascender.

A final é en campo neutral, pero a afección está moi ilusionada...

A nosa afección sempre foi forte, no noso campo apreta moito, pero nestas dúas últimas tempadas enganchouse máis xente a ver os partidos. Ademais, sempre animan e o certo é que teñen moita ilusión por conseguir esta Copa. E iso a nós dános un plus. 

Rubén Varela (Perlío): “Perdín as tres anteriores e non quero que volva pasar”

Nada menos que desde a tempada 2000/2001 forma parte Rubén Varela do Perlío e hoxe na Gándara xoga a súa cuarta final de Copa. As outras tres perdeunas e non quere que iso volva suceder.

Como afrontan este partido tras una tempada na que conseguiron o ascenso?

Afrontámolo sen presión porque o noso obxectivo era volver a Primeira Galicia, despois do pau que supuxo o descenso do ano pasado. Temos moita ilusión por cambiar a historia do club neste trofeo porque perdimos as últimas tres finais que xogamos. Queremos lograr a ansiada Copa que tanto se nos resiste.

Cal cre que é a clave para que o Perlío logre a vitoria?

Facer o que vimos facendo desde o inicio de temporada: xogar con intensidade, presionando e, sobre todo, deixar os nervos fóra do campo porque a miña experiencia dime que xogan malas pasadas. Temos que estar tranquilos, aínda que nos vexamos por debaixo no marcador porque creo que se somos quen de despregar o noso xogo conseguiremos a vitoria.

É difícil controlar os nervos con tanta expectación como a que esperta un partido así?

Levamos un par de partidos co público envorcado con nós pola fase de ascenso. Vai haber moitos seareiros, sobre todo os rapaces e rapazas da base do club, que sempre é unha motivación especial. Non creo que a presión nos afecte moito.

Cales son as fortalezas do Cebarca?

A min gústame moito o seu capitán, que leva moito tempo xogando alí e descarga moi ben os balóns de cara. Despois, a xente de banda que ten tamén é moi perigosa e moi rápida. Atrás son contundentes e crean moito perigo no xogo aéreo. Logo teñen un rapaz que veu do Galicia de Mugardos e que xoga de mediapunta, que é moi bo tamén.