O modelo de educación patrimonial “Ponte... nas Ondas!”, que foi recoñecido en 2022 pola Unesco como exemplo de boas prácticas en materia de sensibilización na infancia, renóvase este curso no IES de Catabois. Este programa fomenta a implicación dos escolares nas tradicións propias e trata de sensibilizar aos máis novos na importancia do patrimonio cultural inmaterial.

Ademais de perseguir o obxectivo da sensibilización neste eido, a iniciativa promove a transmisión do patrimonio ás novas xeracións, ao mesmo tempo que se continúa traballando no afianzamento dos lazos coa lusofonía e o vínculo con Portugal. Entre os 19 centros que renovan o modelo, o IES de Catabois é único na comarca. Trátase dun programa que naceu da man da asociación cultural e pedagóxica que leva o mesmo nome.