Baixo o título de “Esta canción me la encontré tirada”, prestado do grupo Triángulo de Amor Bizarro, o Torrente Ballester varía o ton das súas propostas expositivas e mañá, ás 20.00 horas, presenta unha mostra que trata de recoller a estética de ducias de grupos xurdidos no panorama independente nos últimos anos.
Organizada pola Concellería de Cultura, a súa comisaria é Mónica Maneiro quen sintetiza o espírito da mostra: “Tratamos de recoller tanto a música como, sobre todo, o deseño dos grupos ‘indies’ que naceron en Galicia nos últimos anos. Cartaces, vídeos, portadas e tantos produtos creados moitas veces á marxe da industria, autoproducidos e que incluso triunfan fóra de Galicia. Entre a proposta figuran dous documentais, un da produtora Seara sobre e autoedición, e outro novo, ‘Galician Hi-Fi’, feito desde Pontevedra e que analiza como funciona a música independente actual, o uso de redes sociais e das novas tecnoloxías”.

participantes
Ademais de grupos tan populares hoxe como Triángulo de Amor Bizarro, ou outros como Telephone Rouges Fluzo, Novedades Carminha ou Disco Las Palmeras!, figura unha representación do talento local en nomes como os dos ferroláns Carrero Bianco, Bang 74, Quant ou Los Huéspedes Felices.
Son moitos grupos musicais, con estilos que van do pop indie, ao hip-hop, electrónica, punk ou o power pop, entre outros, que están conseguindo unha grande repercusión tamén en España.
A exposición suscita unha análise de como a escena musical busca rodearse doutros actores culturais, prestando atención ás contribucións que as súas colaboracións están xerando ao campo do deseño gráfico (portadas de discos, carteis, fanzines, flyers), ao universo dos blogs e ao audiovisual, incidindo na riqueza cultural que está a xurdir ao compás deste novo movemento musical independente.