Unha representación da Plataforma en defensa do Patromonio Industrial das Pontes mantivo nos últimos días un encontro coa directora xeral de Patrimonio Cultural da Xunta, María del Carmen Insua, e co subdirector xeral de Conservación e Restauración de Bens Culturais, Manuel Chain.

Na Xuntanza, ambas partes abordaron a tramitación do expediente de declaración de Ben de Interese Cultural (BIC) da cheminea da central térmica pontesa.

O colectivo explica que o goberno autonómico solicitou informes aos órganos consultivos, nomeadamente ao consello de cultura galega e a catro relacionados co sistema universitario galego, dos cales, un foi favorable –a lei require dous–, outro non foi concluínte, e o resto non se pronunciaron. “É dicir, ningún deles foi desfavorable”, remarca a Plataforma nun comunicado.

Por outra banda, apuntan a que no prazo dun mes de alegacións, rexistráronse tres en contra da declaración –entre elas a de Endesa e a do Concello–, mentres que fóra do prazo foron tres a favor e catro en contra, ademais da reiteración de Endesa e do Concello –cun informe técnico da Deputación da Coruña–.

O colectivo remarca que esta información recibida por parte do goberno galego será o punto de partida para as vindeiras actuacións da Plataforma, entre as que se plantexa a solicitude dun pleno no Consistorio.
No día de mañá venres levarase a cabo a terceira asamblea –19.30 horas, no Lar–.