O consistorio naronés prepara, dende a Concellaría de Política Social que dirixe María Lorenzo, tres novas actividades do programa municipal “Guizo”, encamiñado a mellorar a socialización en galego dos pequenos. 

Así, no último trimestre do ano desenvolverase unha proposta por mes, para as que é preciso anotarse previamente –no correo electrónico a.pita@naron.gal, facilitando os datos de contacto–. As actividades terán lugar no centro cívico social do Couto e diríxense a menores de entre 6 e 12 anos e ás súas familias, cun total de 15 prazas.

A primeira destas actividades consistirá nun obradoiro de “Saquiños de olores”, este mesmo sábado. Será entre as 11.00 e as 11.30 horas e nela as familias escollerán os seus olores favoritos de plantas como a menta, a rosa ou a canela, para realizar un percorrido sensorial a través do cal coñecerán tamén as súas propiedades.

Xa no vindeiro mes, en novembro, o Concello organiza “Sementando Futuro”, que comezará ás once da mañá e no que se empregarán materiais de refugallo achegados polos asistentes e sementes autóctonas, “para aprender os pasos correctos para crear e manter un viveiro propio”.

Finalmente, o 16 de decembro, entre las 11.30 e as 12.30 horas, terá lugar “O gran xogo da reciclaxe”. Nesta proposta as familias aprenderán a reciclar e reducir residuos, diminuíndo o gasto enerxético nos fogares e coñecendo a relevancia da biodiversidade.

“Fomentar a creatividade das nenas e nenos, facer que valoren a importancia de coidar a natureza e a adquisición de coñecementos para trasladar á súa vida cotiá vivindo experiencias divertidas e emocionantes en galego forman parte dos obxectivos que perseguen este programa”, remarcan dende o executivo naronés.

Aquelas persoas interesadas en coñecer máis información sobre estas actividades poden contactar co Servizo de Normalización Lingüística de Narón ou consultar a web www.naronengalego.gal.