Polas referencias, sobre todo cando son explícitas, saberemos das intencións dos autores de literatura infantoxuvenil. E, neste caso, neste libro para nenos e nenas de dous anos en adiante, non pode haber unha mellor: Maurice Sendak e o irrepetible “Onde viven os monstros”. A Sendak homenaxean os cataláns Jordi Gastó e Christian Inaraja neste pequeno álbum que leva por título “Unha caixa misteriosa”. 

De Gastó e Inaraja coñeciamos –publicounos tamén a potevedresa Kalandraka– “Un gran día de pesca” e “Se che pica un mosquito”, nos que xa despregaron o seu particular estilo, mestura de sinxeleza estética, humor e ritmo narrativo. Neste “Unha caixa misteriosa”, os autores presentan unha situación sinxela: unha nena enfrontada a unha caixa vermella pechada. E cunha pregunta –“Que se gardará alí?”– desata a súa imaxinación, unha das cualidades máis poderosas para as crianzas que, lonxe de reprimir –como se pensaba e hai mesmo quen aínda pensa–, cómpre incentivar.

A protagonista, pois, fantasea con todas as posibilidades que pode conter a caixa, desde cousiñas materiais ata personaxes e animais de todo tipo. Todo colle nesa caixa e no maxín desta nena. 
 

Hai historias aparentemente sinxelas que non o son en realidade. Esta paréceo, mais a mensaxe que agocha é tremendamente inspiradora: deixen xogar aos cativos e cativas, facilítenlles eses momentos para que poidan desenvolver todo o seu potencial e, sobre todo, sáquenlles das mans as pantallas: non son, nestas idades temperás, en absoluto necesarias.