O número de explotacións agrícolas en Galicia caeu un 45,7% entre 2016 e 2023, pasando de 76.406 a 41.507, segundo a Enquisa sobre a Estrutura das Explotacións Agrícolas publicada este xoves polo Instituto Nacional de Estatística (INE).

Desta maneira, o emprego nestas explotacións baixou tamén un 38,3%, ata rexistrar unhas 44.842 unidades de traballo ao ano totais.

Do total de explotacións galegas, case un 23% ten menos dunha hectárea, mentres que só un 0,86% supera as 100 hectáreas. A estatística tamén recolle que en Galicia hai 22.667 explotacións bovinas, sendo a máis habitual, con máis de 1,1 millóns de cabezas de vacas e demais especies.

As segundas son as explotacións porcinas, con máis de 6.300 e 1,2 millóns de cabezas. Así mesmo, ata 4.162 explotacións de aves de curral dispoñen de máis de 29,7 millóns de cabezas.

Datos nacionais

A nivel nacional, a man de obra nas explotacións agrícolas reduciuse un 4% en 2023 respecto ao censo agrario de 2020, segundo reflicte a enquisa do INE. En concreto, a man de obra contratada de maneira regular aumentou un 5,6% –un 2,3% nos homes e un 22,2% nas mulleres–, pero a de maneira temporal esborrallouse un 34,5%, mentres que a subcontratada elevouse nun 29,5%.

Doutra banda, a estatística amosa que un total de 358.000 explotacións dispoñían de superficie regable no ano 2023, ascendendo a acadar os 3,5 millóns de hectáreas, mentres que un total de 246.000 explotacións dispoñían de superfice regada, sendo esta de 2,7 millóns de hectáreas.

No que respecta aos métodos de rega cabe sinalar que o 49% da superficie regouse mediante métodos localizados –que inclúen goteo, microaspersión, nebulización, hidropónico e outros–, o 31,6% por aspersión e o 19,4% por gravidade.